SHPALLJE VENDI VAKANT PËR POZICIONIN:
PËRGJEGJËS SEKTORI, SEKTORI I FINANCËS DHE SHËRBIMEVE MBËSHTETËSE – KLASA III-1
Në mbështetje të Ligjit nr. 93/2022, “Për dekoratat në Republikën e Shqipërisë”, dhe të dispozitave të Kodit të Punës të Republikës së Shqipërisë, të miratuar me Ligjin nr. 7961, datë 12.07.1995, të ndryshuar, Urdhrit të Kryeministrit nr. 88, datë 20.06.2025 “Për miratimin e strukturës dhe organikës së Kancelarisë së Urdhrave dhe Medaljeve”, si dhe në përputhje me aktet nënligjore në fuqi njoftohet hapja e pozicionit të lirë të punës si vijon:
1. TË DHËNAT PËR POZICIONIN E PUNËS
Emërtesa e pozicionit: Përgjegjës Sektori
Institucioni: Kancelaria e Urdhrave dhe Medaljeve
Sektori: Sektori i Financës dhe Shërbimeve Mbështetëse
Raporton tek: Kancelari dhe zëvendëskancelari
2. DETYRAT KRYESORE
Përgjegjësi i sektorit ndër të tjera:
• Harton dhe bashkërendon punën për përgatitjen e buxhetit të institucionit në përputhje me kërkesat e nevojshme dhe parashikimet financiare.
• Kontrollon dokumentacionin për gjithë veprimtarinë ekonomike financiare dhe ndjek përdorimin e fondeve buxhetore konform akteve ligjore dhe nënligjore në fuqi.
• Harton dhe monitoron planin financiar të Kancelarisë, duke siguruar që të gjitha shpenzimet të jenë brenda kufizimeve të buxhetit të miratuar.
• Përcakton nevojat për burime financiare dhe jep rekomandime për optimizimin e shpenzimeve.
• Kontrollon shpenzimet dhe transaksionet financiare për të siguruar që ato të jenë të ligjshme dhe të përputhshme me politikat financiare të Kancelarisë dhe legjislacionin në fuqi.
• Përcjell dhe analizon shpenzimet e realizuara dhe siguron që ato të jenë brenda kuadrit të miratuar.
• Përgatit raporte mujore dhe vjetore mbi shpenzimet dhe gjendjen financiare të institucionit.
• Përgatit dhe paraqet raporte financiare të plota dhe të sakta, përfshirë bilance, raporte të fluksit të parasë dhe analiza financiare për menaxhimin e Kancelarisë.
• Siguron që të gjitha dokumentet dhe raportet financiare të përputhen me kërkesat ligjore dhe rregullat e kontabilitetit të shtetit.
• Pjesëmarrës në përgatitjen e auditeve të brendshme dhe të jashtme, duke ofruar dokumente dhe informacione të kërkuara.
• Mbështet dhe monitoron proceset e menaxhimin e kontratave në përputhje me rregullat e prokurimit publik dhe politikat financiare.
• Siguron që të gjitha kontratat dhe angazhimet financiare të jenë të dokumentuara dhe në përputhje me legjislacionin dhe standardet e Kancelarisë.
• Raportimi dhe dhënia e informacionit periodik dhe të vazhdueshëm për punën dhe përmbushjen e detyrave të sektorit në kuadër të veprimtarisë së njësisë organizative, të kryhet në afat dhe sipas procedurës së përcaktuar në aktet e nxjerra nga Kancelari për këtë qëllim.
• Procesi i kontrollit dhe inventarizimit të kryhet rregullisht dhe në përputhje me legjislacionin përkatës.
• Mbajtja e llogarive të shpenzimeve faktike të Kancelarisë të jetë e plotë dhe e saktë, në përputhje me legjislacionin shqiptar të kontabilitetit.
• Si nëpunës zbatues i institucionit bashkëpunon me:
o Drejtorinë e Përgjithshme të Thesarit në Ministrinë e Financave dhe Drejtorinë e Thesarit Tiranë në lidhje me raportimin e transaksioneve financiare të pranë bankave të nivelit të dytë.
o Drejtorinë e Përgjithshme të Tatimeve, si dhe Drejtorinë Rajonale Tatimore Tiranë në lidhje me deklarimet on-line, të listëpagesave të punonjësve, si dhe pagesat e sigurimeve shoqërore, shëndetësore si dhe tatimeve.
o Me Drejtorinë Rajonale të Sigurimeve Shoqërore në lidhje me raportet e paaftësisë për punë si dhe shpërblimet për leje barrëlindjeje.
o Përfaqëson institucionin, në marrëdhëniet me bankat e nivelit të dytë dhe institucionet e tjera që Kancelaria ka marrëdhënie.
3. KUSHTET QË DUHET TË PLOTËSOJË KANDIDATI
Kandidatët duhet të plotësojnë kërkesat e përgjithshme si më poshtë:
a. Të kenë shtetësinë shqiptare;
b. Të gëzojnë zotësi të plotë për të vepruar;
c. Të gëzojnë integritet moral dhe profesional;
d. Të plotësojë kërkesat e posaçme për nivelin e arsimit, përvojës dhe kërkesat e tjera të posaçme për kategorinë, klasën, grupin dhe pozicionin përkatës;
e. Të jetë i aftë për punë;
f. Të mos jenë të dënuar me një vendim gjykate të formës së prerë;
g. Të mos i jetë hequr e drejta e ushtrimit të detyrës në administratën publike me vendim gjyqësor të formës së prerë;
h. Të mos jetë larguar për shkelje disiplinore nga administrata publike, si dhe të mos ketë masë disiplinore në fuqi të rëndë sipas Kodit të Punës;
i. Të mos ketë konflikt interesi me detyrën ose funksionin që do të kryejë.
4. KËRKESAT E VEÇANTA
Arsimi: Të zotëroje diplomë, Master Shkencor ose master profesional në Shkenca Ekonomike-Financiare.
Përvoja: Të ketë minimalisht 3 vite eksperiencë profesionale në fushën e menaxhimit financiar dhe kontrollit, kontabilitetit, bilanceve, bankave, prokurimeve, shërbimeve administrative etj.
Të tjera:
• Të zotërojë njohuri shumë të mira praktike në përdorimin e kompjuterit dhe të programeve aplikative dhe aftësi për të përpunuar tabela me të dhëna numerike.
• Të zotërojë njohuri shumë të mira të gjuhës Angleze, preferohen edhe gjuhë të tjera të BE, shoqëruar me dëshmitë përkatëse.
• Të ketë aftësi analitike dhe krijuese për zgjidhjen e situatave komplekse.
• Aftësi vet-motivuese për të punuar i pavaruar brenda afateve kohore të ngushta në një mjedis pune intensiv, me qëllim përgatitjen e dokumenteve financiare.
5. FUSHA KRYESORE MBI TË CILËN BAZOHET KONKURIMI:
- Kushtetuta e Republikës së Shqiperise;
- Kodi i Punës
- Kodi i Procedurave Administrative
- Ligji nr.93/2022, “Për dekoratat në Republikën e Shqipërisë”
- Ligjin nr.9131, datë 08.09.2003 “Për rregullat e etikës në administratën publike;
- Ligjin nr.119/2014 “Për të drejtën e informimit” i ndryshuar;
- Ligjin nr. 124/2024 “Për mbrojtjen e të dhënave personale”
- Ligjin nr. 9367, datë 07.04.2005 “Për parandalimin e konfliktit të interesave në ushtrimin e funksioneve publike” i ndryshuar;
- Ligjin nr.9049, datë 10.4.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë” i ndryshuar;
6. DOKUMENTACIONI, MËNYRA DHE AFATI I DORËZIMIT
- Kandidatët e interesuar paraqesin kërkesën brenda afateve të përcaktuara pranë zyrës së protokollit të Kancelarisë së Urdhrave dhe Medaljeve dhe kërkesa shoqërohet me:
a. Jetëshkrim i aplikantit;
b. Fotokopje të diplomës. Për diplomat e marra jashtë Republikës së Shqipërisë të përcillet njehsimi nga Ministria e Arsimit dhe e Sportit;
c. Fotokopje të librezës së punës (të gjitha faqet që vërtetojnë eksperiencën në punë);
d. Fotokopje të letërnjoftimit (ID);
e. Vërtetim të gjendjes shëndetësore;
f. Vetëdeklarim të gjendjes gjyqësore/Dëshmi Penaliteti;
g. Çdo dokumentacion tjetër që vërteton trajnimet, kualifikimet, arsimin shtesë, vlerësimet pozitive apo të tjera të përmendura në jetëshkrimin tuaj;
Aplikimi dhe dorëzimi i të gjitha dokumenteve të cituara më sipër, do të bëhet në zyrën e protokollit të Kancelarisë me adresë: Adresa: Bulevardi “Dëshmorët e Kombit”, Nr.1, Godina e Kryeministrisë, Tiranë. Kandidatët e interesuar paraqesin kërkesën për aplikim, dokumentacionin si më sipër dhe dokumentacionin vërtetues brenda dates 12.09.2025.