Rekrutimi dhe vlerësimi i nëpunësit civil bazuar në meritë dhe performancë, ishte fokusi kryesor i vizitës së punës së përfaqësuesve të Departamentit të Administratës Publike në një ndër shtetet më të përparuara në aspektin e menaxhimit të burimeve njerëzore, Finlandë. Njohja me arritjet dhe sfidat e reformës në administratën publike finlandeze, menaxhimin e burimeve njerëzore, përshkrimet e punës, sistemin e shpërblimit, etj ishte një vlerë e shtuar e pjesëmarrësve nga Shqipëria. Gjatë vizitës dyditore u shpjeguan nga afër praktikat inspiruese dhe inovative që përdor ky shtet ndaj nëpunësve, për t'u mundësuar edhe vendeve të Ballkanit Perëndimor eksperiencën e tyre të jashtëzakonshme në këtë drejtim.
Vizita e punës në Helsinki u organizua nga Shkolla Rajonale e Administratës Publike (ReSPA) në datat 10 - 12 dhjetor.
Miratohet plani i rekrutimit për 2020-ën 880 vende vakante në shërbimin civil
Këshilli i Ministrave miratoi më 15 janar planin e rekrutimit të vendeve vakante në institucionet e administratës shtetërore (pjesë e shërbimit civil) për vitin 2020. Referuar planit, Departamenti i Administratës Publike do të publikojë përgjatë këtij viti, 880 vende vakante sipas këtyre kategorive:
- Trupa e Nëpunësve Civilë të Nivelit të
Lartë Drejtues (TND) 3;
- Kategoria e mesme drejtuese 59;
- Kategoria e ulët drejtuese 150;
- Kategoria ekzekutive 668.
Për kategorinë ekzekutive pozicionet që do të shpallen do të jenë me shkenca juridike, ekonomike, shoqërore, inxhinierike, ekzakte, edukimi, mjekësore, sociale, biologjike, arsim i lartë e të tjerë.