Në datën 31 mars, në takimin koordinues për projektin më të ri "Ngritja e kapaciteteve për nëpunësit civilë të administratës publike, duke përfshirë trajnimet/praktikat në administratat e shteteve anëtare të BE-së dhe vizita studimore (Qelizat e reja)”, Departamenti i Administratës Publike bashkë me ekipin e projektit diskutuan qëllimet, objektivat dhe planin e veprimit të punës në vijim.
Projekti i cili do të hapë së shpejti thirrjen për aplikime për nëpunësit civilë të administratës shtetërore, institucioneve të pavarura dhe njësive të vetqeverisjes vendore financohet nga Bashkimi Evropian. Programi do të përfshijë:
- 10 javë praktikë pune/ internship (Francë, Gjermani, Itali, Kroaci dhe Greqi)
- Vizita studimore në vendet anëtare të Bashkimit Evropian (Francë, Itali dhe Gjermani)
- Shkolla online dhe sesione mentorimi
- Seminare dhe workshope
Programi do të zbatohet nga Instituti Kombëtar Francez i Shërbimit Publik (French National Institute of Public Service/INSP) dhe partnerët: Universiteti i Shkencave Administrative të Aplikuara në Kehl (Gjermani); Universiteti i Bolonjës; rajonin Emilia-Romagna (Itali) dhe dy partnerët shoqërues Shkolla e Administratës Publike e Kroacisë dhe Greqisë në bashkëpunim me Departamentin e Administratës Publike dhe Shkollën Shqiptare të Administratës Publike.
"Bashkë me ekspertizën e partnerëve të përbashkët, do të bëjmë një punë të shkëlqyer për të motivuar dhe forcuar më tej kapacitetet e nëpunësve civilë për t’i përgatitur për sfidat e procesit të integrimit evropian" - tha drejtori i DAP, Albana Koçiu, gjatë takimit online.
