Shkolla Rajonale e Administratës Publike (ReSPA) organizoi modulin e parë të një seri modulesh për trajnimin e ngritjes së kapaciteteve mbi Grup - Kapitujt "Themelorët" të procesit të anëtarësimit në BE. 

Në trajnimin e zhvilluar në Beograd, Serbi, morën pjesë 25 nëpunës nga administratat e vendeve të Ballkanit Perëndimor, të angazhuar në procesin e anëtarësimit në BE.

Fokusi i trajnimit: Përditësimet e fundit të Kapitullit 23 (Gjyqësori dhe të Drejtat Themelore), Kapitullit 24 (Drejtësia, Liria dhe Siguria), Reforma në Administratën Publike dhe Prokurimi Publik.

Genti Xhaxhiu, Koordinator i Programit në ReSPA tha se:- "Është shumë i rëndësishëm zhvillimi profesional i nëpunësve, pasi njohuritë dhe përmirësimi i aftësive të tyre janë thelbësore për avancimin drejt anëtarësimit në BE dhe për përmbushjen e kritereve të qeverisjes së mirë dhe sundimit të ligjit."

Aleksandar Andrija Pejović, Simonida Kacarska, Miodrag Radović dhe Marija Vlajković udhëhoqën pjesëmarrësit përmes ushtrimeve praktike dhe diskutimeve, duke u fokusuar në zgjidhjen e sfidave kryesore të integrimit në BE dhe reformat e nevojshme për përmbushjen e kritereve të anëtarësimit.

Procesi i integrimit mbështetet nga Plani i Ri i Rritjes, që synon përshpejtimin e reformave dhe përmirësimin e mirëqenies ekonomike të rajonit, në përputhje me ligjet dhe standardet e BE-së.